نترككم مع القصيدة :

حزني اللي غاب له فتره لفاني
من عقب شاكر غدا وضعي حزين

والله اني عقب شاكر حيل اعاني
وذكرياته ولعت شوق ٍ دفين

كنت اعزه واحسبه حسبة اخواني
من الغلا يطري علي في كل حين

بسمته ياحلوها يامن لفاني
وفزته يشعر بها اللي حاضرين

بيننا حبّ ومراجل مع أماني
بيننا حبّ العباد المؤمنين

ياتقابلنا تذاكرنا الأغاني
يوم كنا بالبساطه دالهين

نضحك ونمزح على كل المعاني
لا كلافه لا زعل متوالفين

اذكره دمّه خفيف وبه لياني
مايكدر صاحبه لو هو حزين

في مجال الطيب له وزن وكياني
معدنه معدن رجالٍ خيرين

انعقد يا شاكر وربي لساني
يوم صرت بموكب اللي راحلين

ماخبرتك ياطيب العالم أناني
ليتنا ياليتنا متوادعين

تدري انك غالي وفقدك رماني
ياحبيبٍ وقفت فيك السنين

الزمن عقبه فلا كنّه زماني
كل ساعاتي لها همّي رهين

ذكرياتك في حياتي شي ثاني
وشي ثاني ذكرياتي والحنين

يازميل المدرسه عقبك غزاني
جيش حزنٍ بالحنايا ساكنين

ماقدرت انسى ولا حزني نساني
هي كذا ذكراك مع حزني تحين

يرحمك ربٍ عطاك احلى المعاني
جعل قبرك روض زهر وياسمين

يالله انه صار بالقبر وحداني
ارحمه واغفر ذنوبه يا معين

نلتقي ياشاكر بوسط الجناني
وربنا قادر وحنا طامعين

قلتها وختامها اطلب اخواني
دعوه لشاكر وكل المسلمين

الشاعر جميل عايد الرويلي

اللهم ارحم شاكر
وجميع موتى المسلمين

رابط الفيديو مباشر : http://www.youtube.com/watch?v=X9iV13H7_FI&feature=youtu.be

[SITECODE=”youtube X9iV13H7_FI”]X9iV13H7_FI[/SITECODE]